A literatura pon ao noso alcance historias que non só entreteñen, senón que tamén nos permiten mergullarnos en experiencias enriquecedoras e incluso didácticas. Se falamos de libros sobre síndrome de Down, existen numerosas obras que poden ser de axuda á hora de convivir con esta condición e derrubar mitos e prexuízos. Desde contos infantís para nenos e nenas ata guías e historias inspiradoras para familias, neste artigo atoparás unha selección de libros actuais que axudan a explicar a síndrome de Down desde novas perspectivas e traballar a empatía e a compresión.
Libros infantís sobre síndrome de Down
Anastasia la valiente (Manuel Ferrero y José Luis Navarro)
![]()
Manuel Ferrero e José Luis Navarro cóntannos a inspiradora historia de Anastasia, unha nena valente coa síndrome de Down. A través das páxinas deste libro, os lectores e lectoras descubrirán como Anastasia enfronta desafíos e celebra os seus éxitos, promovendo valores de autoaceptación, inclusión e resiliencia.
3 cromosomas (Yani León)
![]()
3 cromosomas de Yani León utiliza un enfoque sinxelo e accesible para explicar a síndrome de Down aos nenos e nenas. A historia segue a un protagonista coa síndrome de Down, explorando de maneira amorosa e educativa a singularidade e as fortalezas que achega cada persoa á sociedade.
Pepita es especial (Fabiola Arroyo e Irene G. Lenguas)
![]()
En Pepita es especial, Fabiola Arroyo e Irene G. Lenguas presentan a historia de Pepita, unha nena coa síndrome de Down. O libro explora a vida cotiá de Pepita e destaca os seus talentos e singularidades, fomentando a aceptación e a comprensión nos lectores e lectoras máis novos.
Carlota, Marieta y el cofre de las ideas (Sara Mª Pérez Picarzo)
![]()
Un entrañable conto sobre a amizade e a imaxinación na infancia, a través da historia de Carlota e Marieta, dúas amigas que van xuntas a un colexio inclusivo no que nenos e nenas con e sen discapacidade aprenden xuntos. Unha delas é zurda e alérxica ao glute, mentres que a outra ten síndrome de Down. Podes ampliar información sobre o libro e ler unha entrevista coa súa autora nesta ligazón.
El mejor hermano contra el bullying (Down España)
![]()
Este libro en formato cómic elaborado por Down España en colaboración co Ministerio de Dereitos Sociais e Axenda 2030 mergúllanos na historia dun neno e o seu irmán coa síndrome de Down. Unha lectura amena que, ademais de explicar o que é a síndrome de Down, axúdanos a identificar o bullying e como actuar ante el. Tamén inclúe actividades para que os nenos e nenas entendan mellor ambas situacións.
Las preguntas de Delfina
![]()
Marisa Aguirre, psicóloga e nai dunha rapaza coa síndrome de Down, plasmou neste libro as dúbidas que lle formulaba a súa filla cada noite antes de ir durmir. Consciente de que, seguramente, as dúbidas de Delfina teríanas tamén outros nenos e nenas, quixo responder a elas en Las preguntas de Delfina, a medio camiño entre libro infantil e guía para familias. Unha lectura que fai fincapé nos valores de respecto e empatía que tan importantes son á hora de educar a futuras persoas adultas máis concienciadas ca súa contorna.
Tranquila (Jessica Requena)
![]()
Outro cómic, neste caso sobre a figura dos irmáns e as irmás de persoas coa síndrome de Down. Jessica Requena, a súa autora, escribiuno trala morte do seu irmán, para non esquecer nada dos seus 25 anos de vida. O resultado é unha historia que emociona e reivindica a importancia de “desfrutar cada segundo a pesar dos inconvenientes e dificultades que poidan xurdir na vida e no día a día”, en palabras da propia Jessica.
Xela celebra o seu aniversario (Pepe Carreiro)
![]()
Editado pola Federación Down Galicia e protagonizado polas personaxes dos Bolechas, esta lectura en galego (que pode lerse online) pretende concienciar ás xeracións máis novas sobre o valor da inclusión e a importancia de vivir nunha sociedade non excluínte. Pepe Carreiro utiliza a festa de aniversario de Xela, unha rapaza coa síndrome de Down, como fío condutor dunha historia que serve tanto para explicar a síndrome como para combater os mitos e prexuízos máis habituais sobre el.
Tengo síndrome de Down (Helena Kraljic)
![]()
Escrito por Helena Kraljic e ilustrado por Maja Lubi, o éxito deste conto no seu país de orixe, Eslovenia, fixo que se traducise máis tarde a outros idiomas, entre eles o español. O seu obxectivo é que os nenos e nenas comprendan, desde os seus primeiros anos de vida, que a síndrome de Down é soamente unha característica máis das persoas. A través da historia do protagonista, David, o libro promove a diversidade e a inclusión, rompendo mitos e desbotando visións estereotipadas sobre esta discapacidade. Está prologado polo presidente de Down España e a editorial, Ediciones Jaguar, destina parte dos beneficios de cada venda á Federación para seguir traballando en pro da inclusión.
Ata aquí a nosa selección de libros que deberían ler non soamente os nenos e nenas, senón tamén as súas familias e calquera persoa que queira fortalecer o seu compromiso cun mundo que celebre a diversidade e o entendemento. Para máis información en liña sobre a síndrome de Down, recorda que na revista trimestral de Down Galicia e na nosa sección de noticias encontrarás tamén artigos de interese, novidades e historias inspiradoras que che axudarán a empatizar e comprender esta realidade que afrontan cada día millóns de familias no mundo.